தை, ஆடி மாதங்களில் வரும் அமாவாசையை போன்று புரட்டாசி மாதத்தில் வரும் அமாவாசையை மகாளய அமாவாசை என்றும், அதற்கு முன்பு வரும் 15 நாட்களை மகாளய பட்சம் என்றும் அழைக்கிறோம்.
இந்த நாட்களில் முன்னோர்களை வழிபட்டு, 15 நாட்களும் முன்னோர்களுக்கு தர்ப்பணம் கொடுத்தும், தான தர்மங்கள் செய்வதும் மிகவும் சிறப்பானது ஆகும்.
ஒருவர் வாழ்க்கையில் என்ன நல்லது செய்தும் கஷ்டப்படுகிறார்கள் என்றால், அது பித்ரு தோஷம் இருப்பதால் தான்.
அதாவது முன்னோர்களின் ஆசி கிடைக்காவிட்டால் இப்படி ஒரு நபர் வாழ்க்கையில் பிரச்சனைகளை சந்திப்பார்கள் என்று சொல்லப்படுகிறது.
இப்படி இருப்பவர்கள் தை, ஆடி அமாவாசையை விட்டால் கூட, இந்த மகாளய அமாவாசையை கடைபிடிப்பது அவசியமானதாகும்.
மகாளய பட்சம் இந்த ஆண்டு செப்டம்பர் 08ம் தேதி துவங்குகிறது. செப்டம்பர் 21ம் தேதி ஞாயிற்றுக்கிழமை மகாளய அமாவாசை அமைந்துள்ளது.
மகாளய பட்ச காலத்தில் எந்தெந்த திதிகளில் தர்ப்பணம் செய்தால் என்ன பலன் கிடைக்கும், மகாளய பட்ச காலத்தில் என்ன செய்ய வேண்டும் என்பதை தெரிந்து கொள்ளலாம்.
ஒரு ஆண்டில் வரும் மிக முக்கியமான வழிகாட்டு காலங்களில் ஒன்று மகாளய பட்சம். ஆவணி மாத பெளர்ணமிக்கு பிறகு வரும் பதினைந்து நாட்கள் மகாளய பட்சம் காலமாகும். “மகாளயம்’ என்றால் “பெரிய கூட்டம் என்று பொருள்”. பட்சம் என்றால் 15 நாட்கள் கொண்ட ஒரு கால அளவாகும்.

நம்முடைய முன்னோர்கள் அனைவரும் ஒன்று சேர்ந்து கூட்டமாக பித்ருலோகத்தில் இருந்து பூலோகத்திற்கு வந்து, நாம் அளிக்கும் தர்ப்பணம், தானம், வழிபாடுகள் போன்றவற்றை ஏற்று, நமக்கு ஆசி வழங்கும் காலமாகும்.
மகாளய பட்சம் காலம்
மறைந்த நம் முன்னோர் பித்ரு லோகத்திலிருந்து இந்த பதினைந்து நாட்கள் நம்மோடு தங்கும் காலமே மகாளய பட்சம் ஆகும். தை அமாவாசை, ஆடி அமாவாசை ஆகியவற்றை விட திதி கொடுப்பதற்க்கு மிகவும் சிறந்தது மகாளய பட்சம் காலம் ஆகும்.
வருடத்தில் மற்ற மாதங்களில் வரும் அமாவாசையன்று முன்னோரை நினைத்து தர்ப்பணம் செய்வோம். அவர்கள் மறைந்த தமிழ் மாதத்தில் வரும் திதியில் சிராத்தம் முதலியன செய்வோம் ஆனால், மகாளய பட்சகாலத்தில் பிரதமை துவங்கி அமாவாசை வரை தினமும் தர்ப்பணம் செய்ய வேண்டும்.
அனைத்து முன்னோரையும் அப்போது நினைவு கூர வேண்டும். புனித நீர் நிலைகள், கடலுக்கு சென்று புனித நீராடி, நம் முன்னோர் ஆத்மசாந்திக்காக பிரார்த்தித்து வர வேண்டும்.
வயதில் பெரியவர்களுக்கும் கற்றறிந்த அறிஞர்களுக்கும் ஆடைகள், ஏழைகளுக்கு பசிக்கு உணவு, படிக்க சிரமப்படும் மாணவர்களுக்கு கல்வி உதவித்தொகை என தானமளிக்க வேண்டும். இவ்வாறு செய்வதால் முன்னோர்கள் மனம் திருப்தி அடைந்து, மகிழ்ச்சியுடன் நம்மை நன்கு அசீர்வாதம் செய்வார்கள்.
அதன் மூலம் பித்ரு சாபம், பங்காளிகளின் சாபம், முன்னோர்கள் சாபம் ஆகியவை விலகி வாழ்க்கையில் சுபிட்சம் உண்டாகும்.
மகாளய அமாவாசை
மகாளய பட்சம் என்பது புரட்டாசி மாதம் பவுர்ணமிக்கு அல்லது ஆவணி பெளர்ணமிக்கு மறுநாள், பிரதமை திதியில் துவங்கி, புரட்டாசி மாதம் அமாவாசை வரை நீடிக்கும். புரட்டாசியில் வரும் அமாவாசையே மகாளய அமாவாசை எனப்படும்.
பொதுவாக ஒவ்வொரு அமாவாசையன்றும் அளிக்கப்படும் தர்ப்பணம் எம தர்மராஜனின் கைகளுக்கு சென்று அவர், நம் முன்னோர்களை அழைத்து அவர்களிடம் ஒப்படைப்பாராம். மஹாளய பட்சம் ஆரம்பிக்கும் நாளன்று நம் முன்னோர்களை அவரவர்கள் விருப்பமான இடத்திற்க்கு சென்று வரும்படி அனுமதிப்பாராம்.

நம் முன்னோர்களுக்கு விருப்பமான இடம் நம் இல்லம் தானே. எனவே அவர்கள் மஹாளய பட்சமான பதினைந்து நாட்களும் நம் இல்லத்தில் வந்திருப்பதாக நம்பிக்கை. இந்த பதினைந்து நாட்களும் நம் வசிப்பிட த்தை சுத்தமாக வைத்திருந்து நம் முன்னோர்களை வணங்கி வந்தால் நம் வாழ்க்கை விருத்தியடைவது உறுதி.
07.09.2025 முதல்நாள் – பௌர்ணமி – பித்ரு தோஷம் நீக்கும்
08.09.2025 இரண்டாம் நாள் – பிரதமை குழந்தைகள் பாக்கியம்
09.09.2025 மூன்றாம் நாள் – துவிதியை – மன அமைதி
10.09.2025 நான்காம் நாள் – சதுர்த்தி – தெய்வீக தன்மை மேலோங்கி நிற்கும்
11.09.2025 ஐந்தாம் நாள் – பஞ்சமி – ஐஸ்வர்யம் சேரும்
12.09.2025 ஆறாம் நாள் – சஷ்டி – புகழ் மேலோங்கி நிற்கும்
13.09.2025 ஏழாம் நாள் – சப்தமி – சிறந்த பதவிகளை அடைதல் உத்தியோகத்தில் தலைமைப் பதவி கிடைக்கும், தடை பட்ட பதவி உயர்வு கிடைக்கும்.
14.09.2025 எட்டாம் நாள் – அஷ்டமி – முக்தி அடையாத ஆன்மாக்கு முக்தி கிடைக்கும். அதன் முலம் நற்பலன் கிடைக்கும்
15.09.2025. ஒன்பதாம் நாள் நவமி – திருமண தடை நீங்கும்.
16.09.2025 பத்தாம் நாள் – தசமி – எல்லா விருப்பங்களும் நிறைவேறும்.
17.09.2025 பதினொன்றாம் நாள் – ஏகாதசி -படிப்பு, கலையில் வளர்ச்சி
18.09.2025 பன்னிரெண்டாம் நாள் – துவாதசி – பொருளாதாரம் உயரும்
19.09.2025 பதின்மூன்றாம் நாள் – திரயோதசி – தீர்க்க ஆயுள்
20.09.2025 பதினான்காம் நாள் – சதுர்த்தசி – ஆரோக்கியம்
21.09.2025 பதினைந்தாம் நாள் – மகாளய அமாவாசை – முன் சொன்ன அத்தனை பலன்களும் நம்மைச் சேர முன்னோர் ஆசி வழங்குதல்.

