தை மாதத்தில் வரக் கூடிய தை அமாவாசையன்று நாம் செய்யும் சில பரிகாரங்கள், வழிபாடுகள் ஆகியன நம்முடைய முன்னோர்களை திருப்தி அடைய வைப்பதுடன், அவர்களின் ஆசியையும் தெய்வங்களின் ஆசியையும் புண்ணிய பலன்களையும் தரும். பித்ரு தோஷத்தில் இருந்து விடுபட இந்த நாளில் செய்ய வேண்டிய பரிகாரங்கள் பற்றி தெரிந்து கொள்ளலாம்.
தை அமாவாசைக்கு “மௌனி அமாவாசை” அல்லது “மாஹி அமாவாசை” என்று பெயர். இந்த நாளில் கங்கை நதியில் நீராடினால், அது அமிர்தம் போல் புனிதமானது என்று நம்பப்படுகிறது. கங்கையில் நீராடுவது எல்லையற்ற புண்ணியத்தையும் மன அமைதியையும் ஆன்மீக நன்மைகளையும் தரும் என்று கூறப்படுகிறது.
புத்தாண்டில் வரும் முதல் அமாவாசையான தை அமாவாசை, உத்திராயண காலத்தில் வரும் முதல் அமாவாசை என்பதால் இதற்கு தனிச்சிறப்பு உண்டு. அதாவது, தேவர்களுக்கு காலைப் பொழுதாக கருதப்படும் தை மாதத்தில் இந்த அமாவாசை வருவதால் பித்ருக்களால் ஏற்படும் பாவங்கள், தோஷங்கள், துன்பங்கள், சாபங்கள் ஆகிய அனைத்திலும் இருந்து விடுபடுவதற்கு ஏற்ற நாளாக இந்த தை அமாவாசை நாள் கருதப்படுகிறது. இந்த நாளில் சில குறிப்பிட்ட எளிய பரிகாரங்களை செய்வதால் எவ்வளவு கடுமையான பித்ரு தோஷத்திலிருந்தும் விடுபட முடியும்.
இவ்வருடம் எதிர் வரும் 18 ஆம் திகதி ஞாயிற்றுக்கிழமை அன்று தை அமாவாசை வருகிறது. இந்த நாளில், அனைத்து நீர் நிலைகள், கடற்கரைகள், நதிக்கரைகளிலும் பக்தர்கள் புனித நீராடி, தங்களின் முன்னோர்களுக்கு தர்ப்பணம் அளித்தும் தான தர்மங்கள் செய்தும் வழிபடுவார்கள். அமாவாசை நாளில் தானம் செய்வதும் புனித நீராடுவதும் மிகவும் முக்கியமானது.
பித்ரு தோஷம் போக்கும் ஐந்து பரிகாரங்கள்
1.முன்னோர்களுக்கு சடங்குகள் செய்தல்- தை அமாவாசையில் முன்னோர்களின் ஆசியைப் பெறவும் அவர்களின் ஆன்மா சாந்தியடையவும் பிண்ட தானம், சிரார்த்தம் மற்றும் முன்னோர்களுக்கு தர்ப்பணம் போன்ற சடங்குகளை செய்வது மிகவும் முக்கியம். இந்த சடங்குகள் முன்னோர்களை மகிழ்வித்து பித்ரு தோஷத்தை நீக்கும். வாழ்க்கையில் தடைகளை சந்திப்பவர்கள் இந்த சடங்குகளை செய்தால் தடைகள் குறையும் என்று கூறப்படுகிறது.
2.முன்னோர்களுக்கு உணவு படைத்தல் – சாஸ்திர நம்பிக்கைகளின் படி, அமாவாசை தினத்தில் முன்னோர்கள் தங்கள் சந்ததியினரை காண பூமிக்கு வருவார்கள். அந்த நாளில் முன்னோர்களுக்கு உணவு படைப்பது அவர்களின் ஆசிகளைப் பெற வழி வகுக்கும் என்று நம்பப்படுகிறது.
3.விளக்கு ஏற்றுதல் – தை அமாவாசை அன்று மாலை, அரச மரத்தின் கீழ் கடுகு எண்ணெயில் ஒரு தீபம் ஏற்றுவது மிகவும் சிறப்பான பலன்களை தரும். அரச மரத்தில் பிரம்மா, விஷ்ணு, சிவன் ஆகியோரும் அவர்களின் பத்தினிகளும் வாசம் செய்வதாக கருதப்படுகிறது.இதனால் அங்கு தீபம் ஏற்றுவது முன்னோர்களின் ஆன்மாவுக்கு அமைதியைத் தரும் என்று கூறப்படுகிறது.
4.தானம் அளித்தல் – தை அமாவாசை நாளில் யாராவது இரண்டு பேருக்காவது அன்னதானம் வழங்குவது மிகவும் சிறப்பானதாகும். இது தவிர, வயதானவர்கள், ஏழைகள் ஆகியோருக்கு அளிக்கும் தானத்தை நம்முடைய முன்னோர்களே வந்து ஏற்பதாக ஐதீகம்.
5.எள்ளும் தண்ணீரும் இறைத்தல் – மேலே சொன்ன எதுவுமே செய்ய முடியாது என்பவர்கள் கூட வீட்டில் இருந்த படியே தங்களின் முன்னோர்களை நினைத்து, எள்ளும் தண்ணீரும் இறைத்து வழிபடுவதால் அதை ஏற்றுக் கொண்டு நம்முடைய முன்னோர்கள் நம்மை ஆசீர்வதிப்பார்கள். இதனால் பித்ருதோஷத்தால் ஏற்படும் துன்பங்களில் இருந்து விடுபட முடியும்.

